কাৰবোক যদি প্ৰশ্ন কৰে যে আপোনাৰ ভয় লাগেনে? বহুতেই নালাগে বুলিয়েই ক’ব । কিন্তু কথাটো সঁচানে? সঁচা কথাটো হৈছে সকলো মানুেহেই ভয় কৰে । ভয় নকৰা মানুহ চয়তানৰ বাবে একো হ’ব নোৱাৰে । তেন্তে চাওঁচোন আহক আপুনি চয়তান নে ভয়াতুৰ!
ভয় মানুহৰ এক স্বাভাৱিক মানসিক অনুভূতি। জীৱনৰ বিভিন্ন পৰিস্থিতিত মানুহে ভয় অনুভৱ কৰে। কেতিয়াবা এই ভয় মানুহক সতৰ্ক আৰু সচেতন কৰি তোলে, কিন্তু অতিৰিক্ত ভয় মানসিক অশান্তি আৰু জীৱনৰ অগ্ৰগতিত বাধা সৃষ্টি কৰে। সেয়ে ভয়ৰ কাৰণ আৰু ইয়াৰ প্ৰতিকাৰৰ বিষয়ে জনা অত্যন্ত প্ৰয়োজনীয়।
ভয়ৰ কাৰণ
মানুহৰ মনত ভয় উদয় হোৱাৰ বহুতো কাৰণ থাকে। প্ৰথমতে, অজ্ঞতা ভয়ৰ মূল কাৰণ। যেতিয়া কোনো বিষয়ৰ ওপৰত সঠিক জ্ঞান নাথাকে, তেতিয়া মানুহে অজানাৰ প্ৰতি ভয় অনুভৱ কৰে। যেনে—অন্ধকাৰ, নতুন ঠাই বা নতুন মানুহৰ সৈতে দেখা হওঁতে ভয় লাগিব পাৰে। কোনো সভাত হঠাতে বক্তব্য ৰাখিব লগাহ’লে হোৱা ভয়, অনাকাংক্ষিত কোনো উচ্চবৰ্গৰ বিষয়া আহিলে তলৰ কৰ্মচাৰী কৰা ভয়, শিক্ষকে কৰি দিয়া কামবোৰ নকৰাকৈ স্কুললৈ আহিলে শিক্ষকৰ পৰা শাস্তি পোৱাৰ ভয়, বেয়া কৰি ধৰা পৰাৰ ভয়, বেয়া বস্তু খাই ঘৰত ধৰা পৰা ভয় আদি অনেক ভয়ে মানুহক ক্ৰিয়া কৰে ।
দ্বিতীয়তে, অতীতৰ তিক্ত অভিজ্ঞতাও ভয়ৰ সৃষ্টি কৰে। যিজনে কোনো দুখজনক বা ভয়ংকৰ ঘটনা আগতে ভুগিছে, তেওঁ সেই একে ধৰণৰ পৰিস্থিতিত পুনৰ ভয় অনুভৱ কৰে। উদাহৰণস্বৰূপে, এবাৰ দুৰ্ঘটনাত পতিত হোৱা ব্যক্তি গাড়ী চলাবলৈ ভয় কৰিব পাৰে।
তৃতীয়তে, সমাজ আৰু পৰিয়ালৰ প্ৰভাৱৰ বাবেও ভয় জন্ম লয়। কেতিয়াবা অভিভাৱক বা সমাজে শিশু বা যুৱক-যুৱতীক অতিমাত্ৰা সতৰ্কতা দেখুৱাই ভয় সৃষ্টি কৰে। ইয়াৰ উপৰিও, অসফলতাৰ ভয়, সমালোচনাৰ ভয়, দাৰিদ্ৰ্য বা ৰোগৰ ভয় মানুহৰ মনত সদায় বিদ্যমান থাকে।
ভয়ৰ প্ৰতিকাৰ
ভয়ৰ পৰা মুক্ত হ’বলৈ মানুহে প্ৰথমে আত্মবিশ্বাস বৃদ্ধি কৰিব লাগিব। নিজৰ শক্তি আৰু সামৰ্থ্যৰ ওপৰত বিশ্বাস থাকিলে ভয় কমে। নিয়মিত অধ্যয়ন, অভ্যাস আৰু ইতিবাচক চিন্তাধাৰা মানুহক সাহসী কৰি তোলে।
দ্বিতীয়তে, জ্ঞান আহৰণ ভয় দূৰ কৰাৰ এক গুৰুত্বপূৰ্ণ উপায়। যি বিষয়ত ভয় লাগে, সেই বিষয়ত সঠিক তথ্য আৰু জ্ঞান লাভ কৰিলে ভয় কমি যায়। যেনে—স্বাস্থ্যৰ বিষয়ে সঠিক জ্ঞান থাকিলে ৰোগৰ অযুক্তিকৰ ভয় হ্ৰাস পায়।
তৃতীয়তে, ধ্যান-যোগ, ব্যায়াম আৰু মানসিক শিথিলতা মানুহৰ ভয় কমাব পাৰে। নিয়মিত ধ্যান কৰিলে মন শান্ত হয় আৰু উদ্বেগ কমে। তদুপৰি, বন্ধু-বান্ধৱ বা পৰিয়ালৰ সৈতে নিজৰ ভয়ৰ বিষয়ে আলোচনা কৰিলেও মানসিক স্বস্তি লাভ হয়।
শেষত ক’ব পাৰি যে ভয় মানুহৰ জীৱনৰ এক অংশ হ’লেও ইয়াক নিয়ন্ত্ৰণ কৰা সম্ভৱ। সাহস, আত্মবিশ্বাস আৰু জ্ঞানৰ জৰিয়তে মানুহে ভয় জয় কৰিব পাৰে। ভয়ক পৰাজিত কৰি আগবাঢ়ি যোৱাই জীৱনৰ সাৰ্থকতা।
No comments:
Post a Comment