সাম্প্ৰতিক অসমৰ উন্নয়ন আৰু ৰাজনীতিৰ ৰেহৰূপ

অসম হৈছে ভাৰতবৰ্ষৰ উত্তৰ-পূৰ্বাঞ্চলৰ এক গুৰুত্বপূর্ণ ৰাজ্য। প্ৰাকৃতিক সম্পদ, উৰ্বৰ ভূমি, চাহ উদ্যোগ, তেল-গেছ সম্পদ, বৃহৎ নদী-বনাঞ্চল আৰু বৈচিত্র্যময় সংস্কৃতিৰে অসমে এক বিশেষ পৰিচয় বহন কৰি আহিছে। সাম্প্ৰতিক সময়ত অসমৰ উন্নয়নৰ গতি উল্লেখযোগ্যভাৱে বৃদ্ধি পাইছে। কিন্তু একে সময়তে ৰাজ্যখনৰ ৰাজনৈতিক পৰিস্থিতিতো বহু নতুন ধাৰা আৰু পৰিবৰ্তন দেখা গৈছে। উন্নয়ন আৰু ৰাজনীতি এই দুটা বিষয় অসমৰ সামাজিক-অর্থনৈতিক আৰু সাংস্কৃতিক ভৱিষ্যতৰ সৈতে গভীৰভাৱে জড়িত।

অসমৰ উন্নয়নৰ সাম্প্ৰতিক চিত্ৰ

সাম্প্ৰতিক বছৰসমূহত অসমে পথ-ঘাট, দলং, ৰেল, বিমানবন্দৰ আদি যোগাযোগ ক্ষেত্ৰত বহু উন্নতি লাভ কৰিছে। নতুন হাইৱে নিৰ্মাণ, গ্ৰামাঞ্চললৈ পকী পথৰ সংযোগ, ব্ৰহ্মপুত্ৰৰ ওপৰত দলং নিৰ্মাণ আদিৰ ফলত ৰাজ্যখনৰ ভিতৰুৱা অঞ্চলসমূহ সহজে নগৰ আৰু বাণিজ্যিক কেন্দ্ৰৰ সৈতে সংযুক্ত হৈছে। এই উন্নত যোগাযোগ ব্যৱস্থাই উদ্যোগ স্থাপন আৰু ব্যৱসায়-বাণিজ্য বৃদ্ধিত সহায় কৰিছে।

অসমৰ শিক্ষা ক্ষেত্ৰতো উন্নয়নৰ পদক্ষেপ লক্ষ্য কৰা যায়। বিদ্যালয়সমূহৰ মানোন্নয়ন, নতুন কলেজ-বিশ্ববিদ্যালয় স্থাপন, ডিজিটেল শিক্ষা ব্যৱস্থাৰ প্ৰচলন আদিৰ ফলত শিক্ষাৰ সুযোগ-সুবিধা বৃদ্ধি পাইছে। উচ্চশিক্ষাত গৱেষণা আৰু পেশাগত পাঠ্যক্রমৰ ক্ষেত্ৰতো নতুন দিশ উন্মোচন হৈছে। একে সময়তে স্বাস্থ্য খণ্ডত নতুন চিকিৎসালয়, চিকিৎসা মহাবিদ্যালয়, প্ৰাথমিক স্বাস্থ্য কেন্দ্ৰ আৰু বিনামূলীয়া চিকিৎসা সুবিধা বৃদ্ধি কৰা হৈছে।

অসমৰ অৰ্থনীতিৰ মূল ভেটি কৃষি, চাহ উদ্যোগ আৰু ক্ষুদ্ৰ উদ্যোগ। আধুনিক কৃষি পদ্ধতি, জৈৱিক কৃষিৰ প্ৰচাৰ, কৃষকৰ সহায়কমূলক আঁচনি, আৰু চাহ উদ্যোগত নতুন বিনিয়োগে ৰাজ্যখনৰ অৰ্থনৈতিক বিকাশত সহায় কৰিছে। লগতে পৰ্যটন ক্ষেত্ৰতো কাজিৰঙা, মানস, ডিব্ৰু-চৈখোৱা, মাজুলী আদি অঞ্চল উন্নয়নৰ জৰিয়তে বিশ্ব পৰ্যটকৰ আকৰ্ষণ বৃদ্ধি পাইছে।

অসমৰ ৰাজনৈতিক পৰিস্থিতিৰ ধাৰা

অসমৰ ৰাজনীতি সদায়েই বৈচিত্র্যপূৰ্ণ। বিভিন্ন জনগোষ্ঠী, ভাষা, ধৰ্ম আৰু সংস্কৃতিৰে গঠিত অসমৰ সমাজব্যৱস্থাত ৰাজনীতি এক জটিল বিষয়। সাম্প্ৰতিক সময়ত অসমত উন্নয়নকেন্দ্ৰিক ৰাজনীতিয়ে অধিক প্ৰাধান্য লাভ কৰিছে। চৰকাৰ আৰু বিভিন্ন ৰাজনৈতিক দলসমূহে চাকৰি সৃষ্টি, যুবসমাজৰ সুযোগ বৃদ্ধি, নতুন উদ্যোগ স্থাপন আৰু সামাজিক কল্যাণ আঁচনিৰ ওপৰত গুৰুত্ব আৰোপ কৰিছে।

কিন্তু অসমৰ ৰাজনীতিত কিছুমান সংবেদনশীল বিষয়ো বৰ্তমানেও গুৰুত্বপূর্ণ। নাগৰিকত্ব, অবৈধ প্ৰব্ৰজন, সীমান্ত সমস্যা, ভাষা-সংস্কৃতি সংৰক্ষণ আদি বিষয় অসমীয়া জনতাৰ মনত গভীৰ প্ৰভাৱ বিস্তাৰ কৰে। এই বিষয়সমূহৰ ওপৰত কেতিয়াবা ৰাজনৈতিক বিতৰ্ক আৰু সামাজিক উত্তেজনাও সৃষ্টি হয়। সেয়েহে উন্নয়নৰ লগতে সামাজিক স্থিতিশীলতা বজাই ৰখা অসমত এক ডাঙৰ প্ৰত্যাহ্বান।

উন্নয়ন বনাম আত্ম পৰিচয়ৰ ৰাজনীতি

অসমত উন্নয়ন আৰু পৰিচয়ৰ ৰাজনীতি একে লগত চলি আছে। এফালে যদি নতুন পথ, উদ্যোগ, শিক্ষা-স্বাস্থ্য উন্নতিৰ কথা আলোচনা হয়, আনফালে জাতিগত পৰিচয়, ভূমিৰ অধিকাৰ, ভাষাগত সুৰক্ষা আদি বিষয়ো ৰাজনৈতিক এজেণ্ডাৰ অংশ হৈ থাকে। উন্নয়ন যদি সকলো জনগোষ্ঠী আৰু অঞ্চললৈ সমানভাৱে নোপোৱা হয়, তেন্তে আঞ্চলিক অসন্তোষ বা বৈষম্য বৃদ্ধি পাব ধৰিছে। সেয়েহে সৰ্বঅন্তভুক্তিমূলক উন্নয়নৰ দিশবোৰ অত্যন্ত প্ৰয়োজনীয়।

যুব-সমাজ আৰু নতুন আশা

সাম্প্ৰতিক অসমৰ ৰাজনীতিত যুব-সমাজৰ ভূমিকা অধিক বৃদ্ধি পাইছে। শিক্ষিত যুব-সমাজে চাকৰি, দক্ষতা বিকাশ, উদ্যোগ স্থাপন, আৰু ডিজিটেল অসম গঢ়াৰ দাবী জনাইছে। নতুন প্ৰজন্মই পৰম্পৰাগত ৰাজনীতিৰ পৰিৱৰ্তে বাস্তৱ আৰু ফলাফলমুখী উন্নয়ন আৰু স্বচ্ছ শাসন ব্যৱস্থা কামনা কৰিছে। এই পৰিবৰ্তিত মানসিকতাই অসমৰ ৰাজনীতিত নতুন গতি আনিছে।

অসমৰ উন্নয়নৰ প্ৰত্যাহ্বান 

যদিও অসমে বহু ক্ষেত্ৰত অগ্ৰগতি লাভ কৰিছে, তথাপিও কিছুমান সমস্যা আজিও বিদ্যমান। বানপানী আৰু নদী খহনীয়া অসমৰ প্ৰধান প্ৰাকৃতিক সমস্যা। প্ৰতি বছৰে বানপানীয়ে কৃষি, ঘৰ-বাৰী আৰু যোগাযোগ ব্যৱস্থা ক্ষতিগ্ৰস্ত কৰে। লগতে নিৱনুৱাৰ সমস্যা, দৰিদ্ৰতা, আৰু কিছুমান অঞ্চলত বিদ্ৰোহ বা অশান্তিৰ ইতিহাসো উন্নয়নৰ বাধা হৈ থিয় দিছে।

এনে পৰিস্থিতিত সুপৰিকল্পিত উন্নয়ন নীতি, শক্তিশালী ৰাজনৈতিক সদিচ্ছা আৰু জনসাধাৰণৰ সহযোগিতাই অসমক অধিক আগুৱাই নিব পাৰে।

সাম্প্ৰতিক প্ৰেক্ষাপটত অসম উন্নয়নৰ পথে আগবাঢ়ি গৈছে। যোগাযোগ, শিক্ষা, স্বাস্থ্য, উদ্যোগ আৰু পৰ্যটন ক্ষেত্ৰত নতুন সম্ভাৱনা সৃষ্টি হৈছে। একে সময়তে অসমৰ ৰাজনীতি পৰিচয়, সীমান্ত, সামাজিক সম্প্ৰীতি আৰু উন্নয়নৰ মাজত ভাৰসাম্য ৰক্ষা কৰিবলৈ চেষ্টা কৰি আছে। অসমৰ প্ৰকৃত অগ্ৰগতি তেতিয়াই সম্ভৱ হ’ব, যেতিয়া উন্নয়নৰ সুফল সকলো জনগণলৈ সমানভাৱে পাব আৰু সামাজিক শান্তি-সম্প্ৰীতি বজাই ৰাখি ৰাজ্যখন এক উন্নত ভৱিষ্যৎ গঢ়িব পাৰিব। সুদৃঢ় নেতৃত্ব, সচেতন নাগৰিক আৰু অন্তর্ভুক্তিমূলক নীতিৰ সহায়ত অসমে আগন্তুক দিনত এক উজ্জ্বল স্থান দখল কৰিব বুলি আশা কৰিব পাৰি।